İran İslam Respublikası BMT-nin atom agentliyinin ona qarşı yeni sanksiyalar sürərsə uranın zənginləşdirilməsi ilə bağlı verdiyi son təklifini götürəcəyini bəyan edib. Bu haqda APA Ria Novosti-yə istinadən məlumat yayıb.

Tehranın Beynəlxalq Atom Enerji Agentliyindəki (MAQATE) nümayəndəsi Əli Əsgər Soltani bildirib ki, İranın zənginləşdirilmiş uranın mübadiləsi ilə bağlı etdiyi təklif hələ ki, müzakirə mövzusudur, ancaq belə davam edərsə bu uzun çəkməyəcək.

BMT Təhlükəsizlik Şurasının beş daimi üzvü və Almaniya tərəfindən İrana təqdim olunan təkliflərə görə həmin uran maddəsi 20 faizə qədər zənginləşdirmək üçün Rusiyaya göndərilməli idi. Daha sonra isə maddə Fransaya aparılaraq orada Amerika texnologiyası əsasında nüvə yanacağına çevrilməli və İrana qaytarılmalı idi.

Bu təklif “Altılar ” tərəfindən qəbul olunsa da rəsmi Tehran bununla razılaşmayıb və uranın zənginləşdirilməsinin İran İslam respublikası ərazisində olmasını israr edib.

ABŞ, Fransa və Britaniya diplomatları isə bu arada BMT Təhlükəsizlik Şurasının İrana qarşı yeni sanksiyaların təklifi ilə bağlı qətnaməsini Rusiya və Çin nümayəndə heyətlərinə göndəriblər.

Qərb dövlətləri İranı nüvə silahının işlənib hazırlanmasında günahlandırırlar. Rəsmi Tehran isə bu ittihamları təkzib edərək nüvə proqramının sülhməramlı olmasını iddia edir.