İsrailin müdafiə ordusu «Feysbuk» sosial şəbəkəsində yerləşdirilmiş məlumat üzündən İordan çayının qərb sahilindəki kənddə həyata keçirilən əməliyyatı təxirə salıb. Bu barədə APA İNTERFAKS-a istinadən xəbər verir.

«Çərşənbə günü biz Katana kəndini təmizləyəcəyik, cümə axşamı isə, Allah qoysa evə qayıdacağıq», - deyə əsgər veb-saytdakı səhifəsində yazıb.

Məlumatda əməliyyatın təfərrüatları və keçirilmə vaxtı da qeyd olunub. Onun əsgər yoldaşları internetdə bu məlumatı görən kimi komandanlığa məlumat veriblər.

İsrailin «Qaley Saxal» ordu radiostansiyasının məlumatına görə, ordu rəhbərliyi məlumatın sızmasının əsgərlərin həyatına təhlükə yarada biləcəyini nəzərə alaraq əməliyyatı dayandırıblar.

Bütün bunlara baxmayaraq əməliyyat uğurla başa çatdırılıb, məlumatı sızdırmış əsgər isə ordu sıralarından xaric olunub.