Azərbaycan üzərindən TRACECA dəhlizi vasitəsilə Avropadan Əfqanıstana ötürülən yüklərin həcmi artır. APA-nın bildirdiyinə görə, bu barədə Azərbaycan Dövlət Xəzər Dəniz Gəmiçiliyinin (XDG) rəisi Aydın Bəşirov məlumat verilib.

A. Bəşirovun sözlərinə görə, hazırda XDG-yə məxsus iki gəmi bu yüklərin Azərbaycan və Qazaxıstan arasında daşınması ilə məşğuldur. Ayda Əfqanıstana göndərilən yüklərdən ibarət 15-20 gəmi reysi həyata keçirilir.

XDG rəisi bildirib ki, hər gəmidə təxminən 100-dən artıq konteyner daşınır. Gəmiçilik rəisi faiz ifadə etməsə də, Əfqanıstana göndərilən yardım yüklərinin həcminin artdığını qeyd edib.

Qeyd edək ki, ABŞ, NATO və TRACECA dəhlizində yerləşən ölkələrin nümayəndələrinin iştirakı ilə ötən ilin mart ayında Bakıda Avropadan humanitar yüklərin Əfqanıstana TRACECA dəhlizi ilə – Poti-Bakı-Aktau (dənizdən keçməklə)-Özbəkistan-Əfqanıstan marşrutu ilə daşınmasına dair razılaşma əldə olunub.