Ermənistanın Azərbaycana təcavüzü, Xocalı faciəsinin 18-ci ildönümü ilə əlaqədar «Xocalıya Ədalət» kampaniyası çərçivəsində Azərbaycanın Əsir və itkin düşmüş, girov götürülmüş vətəndaşlarla əlaqədar Dövlət Komissiyası Qətər, Küveyt və Birləşmiş Ərəb Əmirliklərində, Azərbaycanın bu ölkələrdəki səfirlikləri ilə birgə silsilə tədbirlər keçirib.

Əsir və itkin düşmüş, girov götürülmüş vətəndaşlarla əlaqədar Dövlət Komissiyasından APA-ya verilən məlumata görə, Azərbaycanın Qətərdəki səfirliyi və komissiyanın birgə təşkilatçılığı ilə Doha şəhərində keçirilən tədbirdə Qətərdəki Azərbaycan icmasının nümayəndələri, bu ölkədə akkreditə olunmuş bir sıra xarici ölkələrin diplomatik nümayəndəliklərinin rəhbərləri və diplomatları, yerli kütləvi informasiya vasitələrinin təmsilçiləri, həmçinin Qətərdə çalışan və ölkəmizin dostları olan xeyli sayda xarici vətəndaşlar iştirak ediblər.

Tədbiri giriş sözü ilə açan səfir Eldar Səlimov ermənilər tərəfindən Azərbaycana qarşı törədilmiş terrorçuluq əməllləri və insanlığa qarşı cinayət olan Xocalı faciəsi barədə tədbir iştirakçılarına ətraflı məlumat verib. Dövlət Komissiyasının katibi Şahin Sayılov çıxış edərək tədbir iştirakçılarına faktlar əsasında ermənilərin xalqımıza qarşı həyata keçirdiyi soyqırım, etnik təmizləmə, vandalizm, əsir, girov və itkinlərlə bağlı həqiqətləri çatdırıb. Sonra Qətərdəki ən böyük icma olan Pakistan diasporasının rəhbəri, siyasi tədqiqatçı və yazıçı-publisist Əşrəf Sədiqi çıxış edərək dost və qardaş Azərbaycan xalqının yaşadığı faciələrdən üzüldüklərini və dövlətinin daim ölkəmizin yanında olduğunu xüsusi qeyd edib.

Tədbir iştirakçılarına Xocalı faciəsini və erməni terrorçuluğunun fəsadlarını əks etdirən sənədli film, kitablar, şəkillər və digər faktoloji materiallar təqdim olunub.

Xocalı faciəsinin ildönümü ilə əlaqədar Azərbaycan Respublikasının Küveyt Dövlətindəki səfirliyi Əsir və itkin düşmüş, girov götürülmüş vətəndaşlarla əlaqədar Dövlət Komissiyası ilə birgə sərgi və təqdimat mərasimi təşkil edilib.
Tədbirdə Küveytin dövlət təşkilatlarının nümayəndələri, ictimai xadimlər, Küveytin aparıcı universitetlərinin müəllim-professor heyəti, bu ölkədə akkreditə olunmuş diplomatik korpusun nümayəndələri, Azərbaycan icmasının üzvləri və yerli kütləvi informasiya vasitələri iştirak ediblər.
Tədbirdə çıxış edən səfir Şahin Abdullayev Ermənistanın Azərbaycana qarşı təcavüzü, Xocalı faciəsi barədə tədbir iştirakçılarına ətraflı məlumat verib və «Xocalıya Ədalət» kampaniyası çərçivəsində il ərzində silsilə tədbirlərin davam etdiriləcəyini bildirib.
Dövlət Komissiyasının katibi Şahin Sayılov çıxışında Ermənistanın azərbaycanlılara qarşı etnik təmizləmə və soyqırım siyasəti, beynəlxalq hüquq normalarına zidd olaraq əsir və girov götürülmüş Azərbaycan vətəndaşlarına qarşı törədilmiş cinayətlər haqqında geniş məlumat verib.
Tədbir iştirakçılarına Xocalı faciəsini və erməni terrorçuluğunun fəsadlarını əks etdirən sənədli film, kitablar, şəkillər və digər əyani vəsaitlər və «Xocalı uşaqların gözü ilə» şəkil sərgisi nümayiş etdirilib.

Xocalı faciəsinin ildönümü ilə əlaqədar Azərbaycanın Birləşmiş Ərəb Əmirliklərindəki səfirliyi də Dövlət Komissiyası ilə birgə anım mərasimi təşkil edib. Tədbiri səfir Elxan Qəhrəmanov çıxış edib.